Aktîvîsta TJAyî ameye tehdîdkerdiş

  • 14:39 24 Êlule 2022
  • NAROJANE
Rozerîn Gultekîn
 
STENBOL - Aktîvîsta TJAyî Guldem dogane da zanayîş, kesê ke xo sey îstîxbaratê Anqarayî dayî naskerdiş, aye gêrayê û heqaretê cinsperestî ci rê kerdê. Guldeme derheqê babete de muracatê sûcî kerd.
 
Aktîvîsta TJAyî Guldem Dogane da zanayîş ke 8ê êlule de kes yan zî kesê ke xo sey îstîxbaratê Anqarayî dayê naskerdiş, ci gêrayê û waştî yewbînan rî bi rî bivînê. Tehdîdê ke qebûl nêkero, do derheqê aye de dewa bêro akerdiş û sewbîna do zirar bireso heskerdoxanê ci de ame kerdiş. Qiseykerdiş 38 sanîye dewam kerd û kesê ke xo sey endamê îstîxbaratî dayî naskerdiş, heqaretê cinsperestî kerdî.
 
Muracatê sucî kerd
 
Guldeme bi hemkarîya avûkatanê xo derheqê kesê geyrayê de Serdozgerîya Komare ya Beykozî de muracatê sûcî kerd. Waştişnameyê sucî, sucê sey ‘tehdîd’, ‘heqaret’, ‘binpaykerdişê dayeyê şexsî’ û ‘xirakerdişê hizûrê kesî’ ame amadekerdiş.
 
Serebût munferît nêyo
 
Avûkatan serdayîşê sucî de dîyar kerdî ke Guldeme partîya sîyasî de ca gêna û aktîvîstîya heqê cinîyan kena û vatî, tehdîd û heqareto ke muvekîlê înan ameyo kerdiş, serebûtêkê munferît nêyo. Waştişname de ame vatiş ke dimayê numaraya muvekîle gêraye asteng kerda, eynî kesî bi numareya nimite keye gêrayî û dewam de wina vat: “Kesê wayîrê ewnîyeyîşê sîyasî yê muxalîfî remnayîşê înan, tehdîdkerdişê înan çîyêkê awarte yo û ganî serdayîşê sucî bêro kerdiş û bi nê xesasîyetî bêro cigêrayîş. Pêwa nê ameyo vatiş ke, eke rî bi rî yewbînan nêvînê do dewa ci rê bêro akerdiş û zirar bireso keyeyê aye. Na babete ganî bêro cigêrayîş."
 
Waştî kar û barê qanûnî bêrê destpêkerdiş
 
Sewbîna ame dîyarkerdiş ke seba tehlukeyê bîyaye bêrê astengkerdiş muracatê sûc kerdê û ganî xorî cipersayîş bêro kerdiş û wina ame vatiş: "Ma wazenê derheqê kesî yan zî kesan de heqaret, tehdîd kerdê û hizûrê kesan xirakerdê de kar û barê qanûnî bêrê kerdiş û dewaya îstîmlakî bêra akerdiş."
 
Delîl ameyî pêşkêşkerdiş
 
Sewbîna waştişname de dîmenê ekranî yê qeydê qiseykerdişî û îfadeyê şahidan zî sey delîlî ameyî  pêşkêşkerdiş.