MÊRDÎN - Derheqê şikdar Mehmet Uyanik Ecevîtî ke cinîya ke ci reyde zewecnayebî Vatfa Ecevîte di roje dimayê welidnayîşî qetil kerd de îdîaname ame amadekerdiş û sûcê ‘qestî cinîye qetilkerdiş’ ra cezaya muebetî ameye waştiş û sewbîna sebebê birîndarbîyayîşê dayîka ci Nebahat Ecevîte ra zî sûcê ‘qestî kes birîndarkerdiş’ ra heta 18 serrî ceza ame waştiş. 

 

Taxa Dara ya qezaya Artuklu ya Mêrdînî de 21ê Çeleyî de cinîya bi nameyê Vatfa Ecevîta (26) ke 19ê Çeleyî de tuto ard dinya, hetê şikdar Mehmet Uyanik Ecevitî ra bi haletê birînî ameye qetilkerdiş. Serdozgerîya Komare ya Mêrdînî derheqê şikdarî de îdîanameyê xo temam kerd. 

 

Îdianameyê 6 ripelî de ke sûcê ‘qestî cinîye qetilkerdiş’ û ‘qestî keye ra kes birîndarkerdiş’ ra ame amadekerdiş de derheqê şikdarî de sûcê ‘qestî cinîye qetilkerdiş’ ra cezaya muebetî ame waştiş û sewbîna sebebê birîndarkerdişê dayîka xo Nebahat Ecevîte ra zî sûcê ‘qestî keye ra kes birîndarkerdiş’ ra heta 18 serrî ceza ame waştiş.

 

Îdianame de ca dîya raporê cigêrayîşê cayê qewimîyayîşî, zabitnameyê tespît û şahidê qewimîyayîşî, fezlekeyê asayîşî, zabitnameyê cigêrayîşî û desteserkerdiş, raporê otopsî, raporê laboraturî yê îdrarî, raporê cigêrayîşê teknîk, raporê kesê zano, şahidan, pawitişê şikdarî, raporê edlî, qeydê sicîlê edlî û qeydê nufisî. 

 

Şikdar sûcdarîyê hemverê xo qebûl nêkerdo û îdia keno ke tutê ci 4 serrî ameyo îstîsmarkerdiş. La netîceyê cigêrayîşî de û qeydê kamerayan de yeno dîyîş ke tutî nêameya îstîsmarkerdiş û şikdar seba ke xo bixelesno nê pawitişî kerdo. 

 

Îdianame hetê 3ine Mehkemaya Cezaya Girane ya Mêrdînî ra ame qebûlkerdiş û do roniştişê ewil 23yê Temmuze de bêro dîyîş.