Şîşemzînan de cuya kolektîfe bi berardişî tacedar bena

  • 09:28 2 Hezîrane 2022
  • Krîtîkê Medya
 
 
COLEMÊRG - Dewa Şîşemzînanî de cinîyan bi tewirêke kolektîfî nika ra dest bi hadrekerdişê zimistanî kerdê û wina vatî: "Her çî vay bîyo. Nê zeman dir rûnê xo ra heta ardanê xo her çîyî ma bi xo virazenê." 
 
Qezaya Geverî ya Colemêrgî de dewa Şîşemzînanî ke 40 keyeyî ci de yê, dewijî hem vera berardeyê û hem zî seba krîzê ekonomî nebatê ke arê danê û penîro ke virazenê roşenê pê debara xo kenê. Helênayîşê vewre dir koyan de nebatê tewir bi tewirî zergûn bîyê û cinîyî bi arêdayîşê nê nebatan debara xo kenê. Cinîyî ke seetê serê sibayî rew ra rawirzenê û çîyê nebatê sey sîyabo, çorin arê danê. 
Nebatê ke yenê arêkerdiş verê tîje de yenê wuşkerdiş û vaş di penîrî de çimeyêke pîlî yê debara şarê mintiqa de yeno xebetnayîş. Cinîyê ke arêkerdişê nebatan qedênayê, pesê xo benê wareyan û ci ra şit, penîr û mast virazenê. Nika ra seba zimistanî hadrekerdişan kenê û hetkarîyî danê ekonomîya keyeyî. 
 
'Ma pesê xo benê wareyê ke qedexe nîyê'
 
Cinîya bi nameyê Hatem Enguder eşkera kerd ke ciwîya dewe weşa û no erjnayîş kerd: "Seba behaneyê ewleyî ma nêeşkenê şêrê tayê wareyan la ma pesê xo benê cayêke qedexe nîyê. Coka rayîrî xerepnayeyê û awe dewe de çinî ya ma zametîyan ancenê. Hadreyîyê ma yê zimistanî verî zaf zêde bî la nika coka şertan ma goreyê xo hadreyîyan kenê. Ma nika ra pesê xo doşenê. Ma şit ra penîr virazenê. Ma nîmeyê penîrî xo rê nimnenê yê bînî zî roşenê. Ê ke rewşe ya înan ê ke ekonomîyî başe nîya şitê xo roşenê. La ê ke rewşa înan baş a zî, xo rê penîr virazenê." 
 
'Verî her çî weşêr bî' 
 
Gule Aslane zî dîyar kerd ke heme dewijî bi tewirêke kolektîfî pes doşenê û serê sibayî, di seetê 05:00 yan zî 06:00î de şinê pes doşenê û wina vat: "Heme ciwîya ma bi berardişî derbas kena. Ma mast û penîr virazenê. Ma nika ra kenê çaleya binê herdî. Ma zimistanî penîrê xo vejenê. Rey-rey ma roşenê. Verî wareyê ma xeylêke weş bîyî. Sînorkerdiş çinîbî. Ma goreyê zerrîya xo şîyêne wareyan. La nika wina nîyo." 
 
'Her çî vay o' 
 
Azîme Engîne zî qal kerd ke ê şefeqî rew ra rawurzenê û nika ra dest bi hadreyîyanê zimistanî kerdê û nê çîyî vatî: "Ciwîya kolektîfe hema di dewa ma de dewam de ya. Ma 10 rojî keyeyêke rê şit doşenê, hewceyîyê ê keyeyî qedîya, ma seba keyeyêke bînî xebetênê. Çîyêke ma virazenê hem pakê û hem zî organîkê. Her çî vay beno. Ma êdî nêzanenê vera nê zeman çi bikerê!  Rûnî ra heta ardanê xo ma berarenê. Ez şit bena keye, ez amînê penîrî fînena ci û dima ra beno penîr, kena qutîyan û kena çalika herdî. Ê ke ma ra biwazê, ma roşenê. Kes nêwazeno ma kenê çalika herdî. Ma kîlo bi 50 TL roşenê. Coka zeman, ma bi nê vayî danê  la qezencê ma çinî yo." 
 
'Her çîyê ma organîk o' 
 
Feyrûze Kûtlûke zî di qiseyanê xo de eşkera kerd ke, ê şefeqî rew ra rawurzenê û heme cinîyî têreyde şinê wareyan pes doşenê û wina peynî ro ci ard: "Nika ma hadreyîya zimistanî kenê. Zimistan zamet derbas bî. Karê ma tena pes û viraştişê penîrî nîyo. Ma nebatan arê danê, wuşk kenê, ma înan zî seba zimistanî hadre kenê. Sewbîna ma seba zimistanî kolîyan arê danê. Wusarî barê ma hema zafêrî girano. Ma kede danê la erjîyaye yo. Her çîyê ma xozayîyo û weş o."